Efsanê Munzuri

Rozê dewa de Dêrsımi de, name ?Kêdage? vanê jü dewe de Ağao de zaf dewleti beno. Cıra Munzur vanê, ju ki şüanê de xo beno. Na Munzur zaf mordemo de zerrepak u rinerm beno. Mal u mulê ağay herroz beno çırayneno, sonde ano keno gorre. Doseno, cıra ron, thoraq, most u pendir vezeno.

Rozê wertê dugelunê pilu de herv vejino. Sa-İsmail venga Ağay dano, cıra phoştdariye wazeno. Ağa taê mordemunê xuyê meravu ra pia qolê xo cêno saneno cı, sono lewê Sa-İsmaili de herv keno. Xeyle waxt ke werte ra vêreno ra, hewla kuna’ra Ağay viri, ağa mordemunê xora vano “Kaşkena tenê hewla Xatune ita biyêne, ma xorê bıwerdêne!”

Na qese Munzuri rê beno ayan. Munzur yeno lewê Xatune, vano, “Xatun, canê Ağaê mı hewla wazeno, eke pozena ez cırê berine..”

Cêniya Ağay ravêr sas bena, bado xo’xode vana, “herhal canê na Şüanê maê feqıri hewla wazeno, sermayino xorê nêwazeno, Ağaê xo ki mane keno. Vınde cırê hewla bıpoji, germagerm buro..” Xatune tasê hewla pozena, dana’ra Şüaney dest, vana, “ha, de bijê Ağaê xorê bere..”

Şüane hewla cêno, sono lewê Ağaê xode vejino. Ağa pers keno, vano, “Şüane, tı ita se kena, çıtur ama?” Şüane: “Ağaê mı, canê to hewla ontêne, Xatune pote, mı ki torê nawa arde.” vano u tasê hewla Ağay ser keno’ra derg. Ağa niadao ke, raşt ki hewlawa, hona ki hên germa. Hên xo verde motê hewla u tase beno, sarê xo dano we ke, Munzuro şüane lewe de çino. O arê de Şüane werte ra beno vindi. Ağa endi zoneno ke Munzur wayirê kırameteo.

Xeyle waxt ke vêreno ra, Ağa vejino yeno çê. O sıre de Şüane ki buros dest de mali doseno. Ağa ke yeno, dewız u cirani hêşinê pê, pêro vera cı sonê, ke lew dest ranê u “xêr ama” vazê. Haylemeo henên kuno Yazuye ke, tı vana belka se biyo. Ağa herv ra amo, wazenê merax ra dorme de bêrê pêser. Ağa nat-botê xode qayit beno, bado çımê Ağay gıneno’ra Munzuri u vano, “uyo ke dest phaçi bo, Munzur ve xuyo. Ewliyao pil uyo. Raverdê şêri lew destani!” vano u hetê Munzuri ser sono. Munzur sermayino ke Ağa wazeno destê dey phaçi kero. Burosê sıti dest de hên peyserki sono şüye. Dewız u cirani ki dıma sonê. A game de lınga Munzuri kuna’ra kemere, burosê sıti vıroşki beno, sıt verdino de. Uza cao ke sıt verdino de, cêro ağwa sıpiya jê sıti girina. Cao ke lınga Munzuri kuna’ra cı, uza çewres hêniyê jê sıti vejinê. Ni hêniyu ra çhemê pêda beno, mılet navêra Munzur ki bovera maneno. Munzur hên şüye ro avoro sono, cor kemer de ?Ya Xızır!? vano, beno vindi.

Coka, namê i çhemi beno “Çhemê Munzuri” u namê i koy ki beno “Koê Munzuri”. Cao ke çhımê Munzuriyo, jiarge say beno. Coka cıra vanê ?Jiare?. Sarê Dêrsımi itiqatê xo ve cı ano, her waxt sono uza çılu fino ra cı, qırvanu sare bırneno, niazu keno vıla u xorê, az-uzê xorê, wes u nêwesunê xorê düay keno.

http://diq.wikipedia.org/wiki/Efsan%C3%AA_Munzuri

Yorum yapın

Daha fazla Edebiyatê Zazayan (Zaza Edebiyatı)
Ferhengê Tırkî-Kırmanckî (Zazakî) / A

acı: dej (n) acımak: dejayene ad: name (n) ad cümlesi: cumleya nameyî (m) ad tamlaması: îzafeya nameyî (m) ada: girawe...

Kapat